Adhoora Prem  

  RSS
 Anonymous
(@Anonymous)
Guest

Kotliputra ek bahut hi chota shehar tha jisme kuch 15000 vasi baste the. Yeh shehar Maharaja Chandrasekhar ki rajya ka ek zarurai hisa tha. Kotliputra ke teen taraf unche unche pahad the jo ki kiss yudh ke dauraan ek badi si diwaar ka kaam kar jinko paar kar pana dushman ke liye lagbhag asambhav karaya tha. Jo hissa pahadon se nahi ghira hua tha us hisse mein bade bade patharo ki ek badi si diwaar khadi ki gayi thi jisme upar ki taraf diwaar ke beech mein jagah jagah bilkul chote chote ched kiye gaye the taaki yudh ke dauraan waha se dushmaan ke upar teer kamano ki barsat ki ja sake aur garam tel unke upar fainka ja sake. Diwaar ke beecho beech ek bada 15 foot lohe ka darwaza tha jiska vazan kuch 10 tonne ke aas paas tha is darwaze ko khaas kaari garo ne banaya tha jiske kaaran iski mazbooti mein koi kami nahi thi aur ek saath ye teen haathiyo takh ka vaar jhel sakta tha. Yahan takh ki 15 se 20 toopo ke vaar bhi ek saath jhel sakta tha essi mazbooti thi is darwaaze ki.

Kotliputra ke nivaasi zayda tar kheeti baadi aur pahadon mein bani sone ki khaano mein kaam kar ke apne jeevan ka nivaaran karte the. Raja Chandersekhar apne shauraya ke liye mashur the aur aksar apne bade rajya ka daura karte hue kotliputra mein rukh ke kuch din araam farmaya karte the, jiske kaaran kotliputra ki sukraksha hamesha chak chauband rakhi jaati thi aur hamesha wahan pe kuch 10000 ke aas paas sipahi rehte the, jinme kuch 2000 ghud sawar, 5000 paidal sipahi, 1500 sipahi 150 topo ke saath aur baaki ke 1500 teer dharakh. Itne sipahi rakhne ka ek aur kaaran yeh bhi tha ki kotliputra mein sone ki khaane thi.

Kotliputra mein saare ghar mitti ke bane hue the aur ek pankti mein the, raat ko gaalion mein roshini ke liye mashaleen jalayi jaati thi. Raat ko pahredaari ke liye 15 saniko ki tukri gast ke liye bheji jaati thi har ghaante

Quote
Posted : 10/12/2012 4:20 am
 Anonymous
(@Anonymous)
Guest

Kotliputra paani ki vayavastha ke liye pahado se aate jharno aur sabse zayda vahi se thodi si dur pe behti sangam naam ki nadi par nirabar karta tha, jo kuch bache hue log kotliputra mein kaam nai karte the vo log yahan aa ke machli pakdte the aur phir use wapis shehar le jaa ke shehar mein bech ke apna guzara karte the.

Kotliputra mein raja chandrasekhar ke hi mudra(currency) chalti thi jo ki sikke the, teen prakar ke sikke the sona, chandi aur pittal. Sikke akar mein gol the aur unke bicho bich ek khudta hua tendua bana hua tha jo ki chandrasekhar ke rajya ka pratik tha, ye tendua unke rajya ke jhande mein bhi dekha ja sakta tha, jiska prshthabhumi(background) ka rang gehare hare rang ka tha aur beech mein tendua ret ke rang ka tha.

Sone ke sikko ki kimat 15000 gm chawal ki thi, matlab ek sone ke sikke se aap pandhra kilo chawal kharid sakte the, chandi ke sikko ki kemat 7500 gm chawal ki aur pittal ki 3000 gm chawal ki.

Ye saare sikke ek aprakashith(undisclosed) sathan mein nirmit(manufacture) kiye jaate the jis ke baare mein sirf rajya ka adhikarik sira hi jaanta tha.

Raja chandrasekhar khud apne pure pariwar ke saath hanumantpur mein rehte the jo ki kotliputra ki tulna 5 guna bada tha aur lagbhag 50 koos dur tha. Hanumantpur charon taraf se 20 foot unchi balua(sandstone) pathar se gira hua tha aur wahan ki abaadi 80000 ke aas paas thi jiski raksha ke liye waha pe 55000 saink hamesha tainat rehte the.

Raja chandrasekhar ke pariwar mein unki patni rani padmavati, unke do bete aur ek beti thi. Bade bete ka naam tha yuvraj ankit, lekin sab unko pyaar se yuvraj prem hi bulate the aur chote bete ka naam tha yuvraj sikander jinhe sikander hi bulaya jaata tha . Beti ka naam tha reet aur unhe chotti rajkumari reet kaha jaata tha, reet dono bhaiyo se bhi chotti thi jiske kaaran usko bahut laad pyaar kia jaata tha...

ReplyQuote
Posted : 10/12/2012 4:22 am
 Anonymous
(@Anonymous)
Guest

Ek subah hanmantpur ke paas ke hi ek van mei teen ghode daude ja rahe the aur van ki maun ko cheerte hue ghodo ke paun ki awaz ke saath saath ek aur bhi aa rahi thi aur vo thi ek barahsingha ki dard mein karhane ki awaz bhi suni ja sakti thi.....

Ghodo pe teen log sawar the jo do sabse sawasth godho par yuvraj prem aur sikander sawar the aur teesre ghoda jo itna sawasth nahi tha aur jise baaki dono ghodo ki raftaar ke saath daudne mein kaafi samsya ho rahi thi us pe sawaar tha sena ke senapati ( Commander in Chief ) ka beta ankur.

Barahsingha ko teer lag chuka tha aur vo ladkhta hua bhaagne ki koshish puri koshish raha tha jungle ke gehare bhaag mein bhaagne ki puri tarah koshish kar raha tha aur safal bhi hua, teer uske peth dayi or ke bhaag ke bilkul upar laga tha aur zayda gehra na hone ke kaaran uske bhaagne se nikal kar gira gaya tha aur vo chot ke zakham se ek patli si khoon ki dhar beh kar niche zameen par boond boond gir rahi thi uske bhaagte hue. Jaise hi vo teeno ghodo aur barahsingha ka beech ka fasla khatam hone ko hua, aage ki zameen samapt ho gayi aur aage ek kuch 4 foot choda jharana aa gaya. Jharane ko dekh kar barahsingha ne uski dusri taraf chalang lagne ki koshish ki lekin kamzor hone ke kaaran vo use pura paar na kar paya aur uske piche ke do pair jharne ke bahav mein hi fas gaye, ek baar phir uski ek unchi karha gunj uthi jiske kaaran paas hi ke ped par baithe kuch pakshi ud gaye. Teeno ghode ab jharne ke dusri or aa ke ruke aur teen ghod sawar us par se utare.

" Is udash drish ko dekhiye bhai kaise ye janwar apne zindagi ko bachane ke liye tadap raha hai " yeh pehli awaz thi jo yuvraj sikander ke muh se apne bhai ko dekhte hue nikali, unki awaz mein hi unke dil ka dard jhalakta tha, " Ye is janwar ka bhagya hai mere bhai aur koi bhi iski kismat nahi badal sakta " yuvraj prem ki bilkul shaant aur sithar awaz aayi, unko toh jaise us janwar ka dard dekh ke koi farak hi nahi padta tha. Itni der takh us bechare janwar ka jindagi ke sasth sangarsh abh bhi jaari tha jo ki abh kaafi kaam ho gaya tha aur dheere dheere us dum uske sharir se alag hone laga tha, is drishya ko dekh ke toh shayad kissi pathar dil insaan ka bhi dil pigal jaata par nahi yuvraj prem ne apne kandhe par se dhanush utara aur us par ek tir samyojit(adjust) kia aur chod dia, pir ek dard bhari cheek nikali aur us barahsinghe ka sharir bejaan hi vahan par gir padha aur sirf jharane ke paani ki awaz suni jaane lagi, jo ki kuch samay pehle takh ek sharir ki apni jaan bachane ke sangarsh ki awazo se gunj rahi thi.

Ye sab dekh ke yuvraj sikander ki aankhon se aansu ki do boomde chalak aayi. Yuvraj prem ne wapis dhanush apne kandhe par daala aur apne ghode par baith kar jharne ke dusri or us sithar sharir ko jo ki unke liye ek shikar se badh ke nahi tha ko ghode par sharir ko daalne ke liye jharna paar karne lage, ankur jo abhi takh chup chaap khada ye nazara dekh raha tha vo bhi chup chaap apne ghode pe chada aur yuvraj prem ke piche unki madad karne ke liye chal pada. Yuvraj sikander unhi udar khade ye sab bebasi se dekhte rahe.....

ReplyQuote
Posted : 10/12/2012 4:24 am
 Anonymous
(@Anonymous)
Guest

Jaise hi suraj ki pehli kiran nikali toh rani padmavati aur raja chandrasekhar teyaar hue aur hanumant pur ke beecho beech bane bade hanumaan mandir ke liye nikal pade. Yeh un dono ki roz ki dincharya thi aur unke puja khatam karne ke baad, dono yuvraj vahan puja kiya karte the jiske baad vo mandir aam praja ke puja karne ke liye khol dia jaata tha.

Raja apne ghode pe aage aage chalte the aur rani apni ghoda gaadi mein unke peeche peeche chalti thi. Unki surakhsha ke liye saath mein 15 padal sainko ki tukari chalti thi ko thodi duri bana ke chalti thi dono raja se aur rani se unke samaan aur behatar suraksha ke liye.

Mehal se kuch do kos dur hi vo mandir bana hua tha aur us safar ko tey karne mein kuch bis minute ke aas paas lag jaate the. Dono raja aur rani mandir ke paas aa ke ruke toh unhe mukhaya dawaar se hi chandan aur agar batti ki khushbo ne mantramugad kar diya. Yeh mandir pura sanghmarmar ke pathar se bana hua tha aur pathar par essi kalakaari ki gayi thi jo ki aas paas ke dusre kissi bhi rajya ke kissi bhi mandir mein nahi dekhi ja sakti thi, mandir ka mukhya dawaar 10 foot uncha tha ayr lohe ka bana hua tha, mukhya dawaar se andar aate hi dono taraf bahut hi sundar udyan (garden) the, jisme tarah ke ped paudho ka dhayan badi achi tarah se rakha jaata tha. Mandir ka gumbad sone ka tha aur mandir ki murti 6 foot ke aas pass unchi thi jisme mein bhagwan hanuman ko ek haath mein gadha aur dusre haath se aashirwaad dete khada hua dikhaya gaya tha.

Raja aur rani dono ne zameen par jhuk kar murthi ko pranaam kiya aur fir vahan ke pandit ji ke haatho se chanamrit piya aur phir vahi murthi ke saamne baith ke hanuman chailsa padhne lage. Puja khatam hone ke baad dono hamesha pandit ji se apne bhavish ke baare mein kuch sawal karte the aur aaj bhi unho ne vahi kia.

" Pandit ji, aaj ka hamera din kaisa guzarega " yahi sawal roz pandit ke saamne dohraya jaata tha raja chandrasekhar duvara. " Raja chandrasekhar ji aaj ka aapka din ek dam acha guzarega, par aap hamesha hi rajkumari reet ko yahan lane ko andekha kar dete hain jabki main aap se kahi baar kaha hai ki unka yaha aapke saath aana bahut zarurai hai " aaj phir pandit ne rajkumari reet ki anupasthi ka zikar kiya tha, lekin hamesha ki tarah raja ne muskura kar ye baat taal di aur pandit ji ko pranaam kar ke vaapis mahil ki or chal pade.

Mahal paunch kar

Rani padhmavati rajkumari reet ke shayankakshya ki or badthi hain aur unko aata dekh vahi bahar khade do saink unko jhuk kar salaam karte hai aur unke liye darwaza khol dete hain, rani sidha andar jaati hai toh dekhti hai ki rajkumari abhi bhi so rahi hoti hai. Vo unke bisthar par jaa ke baith jaati hai aur pyaar se unke sar par ek do baar haath firati hai jinse unki neend khul jaati hai aur rajkumari aankheen masalti hui uthti hai aur apni maa ko dekh kar muskuraati hai.

" Uth jaayi rajkumari ji dekhiye abh toh suraj bhi pura bahar nikal aaya hai, aur aap hai ki abhi bhi so rahi hain " rani mamta bhari aankhon se reet ki or dekhte hue kehti hai.

" Jab takh aap uthane na aaye toh uthne ka dil hi karta ma " rajkumari bhi bacho ki tarah muskurate hue kehti hai aur apni ma ki god mein sar rakh ke let jaati hai. " Aaj toh hum uthane aa jaate hai par jab aapke rajkumar aayenge toh vo toh aapko uthne hi nahi denge subah " rani ne bhi shararat andaz rajkumari ki taraf dekhte hue kaha. Ye baat sun kar rajkumari ke gore gaal laal ho jaate hai aur vo sharam se apni ma ki godh mein hi chup jaati hain. Rajkumari reet ko aap husan ki malika toh nahi keh sakte the par unka ek ek ang toh jaise pyaar karne ke liye hi bana tha. Unko dekh kar koi madhosh toh nahi hota tha, par jo unhe ek baar dekh leta tha vo unki aakhoon mein hi kho jaata tha, gehraayi ka samudra jo thi unki baadi baadi ankheen. " Chailye abh sharmaiye mat aur subah ke bhojan ki poshika pehan kar bhojan karne aa jaaiye, aapke dono bhai aur pita aapka intezaar kar rahe hain " keh kar rani ne rajkumari ka sar apni god se hatya aur uth kar bahar chali gayi....

ReplyQuote
Posted : 10/12/2012 4:24 am
 Anonymous
(@Anonymous)
Guest

Kotliputra ki vo subah ek dam saaf aur thandi thi. Vahan pe ek bade aur lambe se kamre mein kotliputra ke kaafi nivaasi upasthit the. " Kotliputra ke nivaasion har roz ki tarah aaj bhi yahan aadalat lagayi jayegi jiska faisla kiya jayega mere aur yahan baithe mere baaki sahakarmi duwara " yeh unchi aawaz jo ki kamre ki diwaaro se thakra ke gunnj rahi thi kotliputra ke swaayatt shaasan ke adhyaksh(mayor) aur senapati aditya ki. Aditya ki umar toh lagbhag 25-30 ke aas paas hi thi, lekin uski nirnaya kshamata kamaal ki thi, jiske kaaran saare kotliputra mein uska kaafi aadhar saaman kia jaata tha.

Aditya jin logo ke baare mein bol ke ishara kar raha tha vo the kotliputra ke bade buzurag jo ki uski nirnaya karne mein sahayata karte the lekin zayda tar toh vo uske faisle ka hi saath dete the.

Kamre mein ki ek taraf se zameen ko lagbhag 8 foot uncha banya gaya tha jispe khade ho ke aditya aur uske sehkarmi logo ki samsya sunte the aur unka samadhaan karne ka prayaas karte the. Yeh unchai islye rakhi gayi thi taaki kamre ke har kone takh dekha ja sake aur nivaasi bhi faisla hote araam se dekh saake, faisla hone ke baad ek baari nivaasion ki bhi raaye maangi jaati thi faisle pe.

Aditya kad mein 6 foot ka tha aur uska badan ek dam kissi yodha ki tarah hi tha. " Toh aaj jis kissi bhi koi bhi samsaya ho vo yahan upar aake hum logon ko bata sakta hai hum log vishwaas dilate hai ki uska nivaran jald se jald aur bina kissi bhed bhaav puri sachai ke saath kiya jayega " ye baaatein roz dohrayi jaati thi jiske baad sab log apni apni
samasya lekar aate the.

" Maalik ye mere padosi ne mere saath dhoka kia hai hai " ek budda aadmi jisne bhure rang ke fatte hue kapde pehne hote hain apne saath laye hue ek 40 saal ki umar ke aas paas aadmi jisne theek thaak neele rang ka kurta aur dhoti pehni hoti hai uski taraf gusse se ishaara karte hue kehta hai. " Kya kia hai isne " aditya bhi sawalia nazaro se dono ko dekhte hue puchta hai. " Maalik mera ghar ke aangan mein ek kuva hai, jis se main apni paani ki zarurato ko pura karta hu aur apne kheto jo ki mere ghar ke theek peeche hain ko bhi paani se sichta hu. Isko dur jharne se paani lene jaana hota tha roz toh isne mujhe anurodh kia ki main apne kuve ka paani iske saath saaja karu, kyunki esse roz bahut dur jaana padta tha." Yeh keh ke vo budda aadmi saans lene ke liye thodi der chup ho gaya, aditya ne dekha ki dusra aadmi abhi tak bilkul chup khada tha usne usko saafi dene ke liye kaha jab buddha aadmi apni baat khatam kare toh aur buddhe aadami ko apni baat jaari rakhne ka ishara kiya. " Maalik pehle toh kuch din yeh aaram se paani leta raha aur mujhe bhi koi pareshaani nahi hui, lekin pichle kuch dino se mujhe bhi paani lene se rokne laga hai aur kehne laga hai ki ab yeh kuva mera hai main ne ise daanta toh isne mujhe apne beto se pitwa dia maalik. " baat khatam karte hue us bechare ki aankhon mein aansu aa jaate hai aur ulta ghum ke apna kurta upar kar ke apni peeth dikhata hai jispe dande se maar padne ke nishaan dekhe ja sakte the. Ye sab dekh kar aditya ne dusre aadami ko dekha toh usne bolna shuru kia " Maalik isne abhi takh aapse jo bhi kaha hai jhut ke alawa kuch nai kaha hai, sach main batata hun maalik, ye kuva mere pita ne banwaya tha aur us samay se ye kuwa meri aur mere pariwaar ki pyaas bhujata tha. Kuch din pehle ye mere paas aaya aur kehne laga ki mujhe apne kheet sichne ke liye jharne se paani lene jaana hota hai, jo ki is umar mein mere liye bahut mushkil hai beta. Toh main ne bhi iske upar taras kha ke isko paani lene dia lekin ab ye aap se keh raha hai ki main ne iska kuwaa cheen lia aur isko maarwaya bhi apne beto se toh maalik aap hi bataiye ki kaun jhot bol raha hai? "

Aditya dono ki baat sun kar kuch der ke liye soch mein padh gaya aur fir bola " Tum dono essa karo ki apne ghar ka pata yahan likhwa do main shaam ko aake dekhta hu ki kaun sacha hai aur kaun jhoota " fir usne un dono ko vahan se bhej dia aur baaki sabki samaysa sun ne laga....

Shaam ko

Aditya apne ghode se utara aur un dono ke ghar ki taraf ko chal pada. Un dono ka ghar baaki gharo ki abaadi se thoda sa dur tha aur dono ka ghar mitti ka hi bana hua tha baaki gharo ki tarah, aditya ne dekha ek ghar mein kaafi daare bani hui thi aur dusre mein ek bhi nahi dekhi ja sakti thi dur se. Aditya ko idhar aata dekhte hi buddha bhaagte hua uski taraf aaya aur usko jhuk ke pranaam kiya " aao maalik kya lenge maalik aap khaane ya pine ke liye kya lenge maalik, mere paas zayda toh nahi hai par jitna hai sab aapke liye haazir hai maalik " aditya ne sar hila ke kuch bi lene se mana kar diya aur usko kuva dikhaane ko kaha.

Kuve ke paas pahunch ke usne dekha ki kuva ki un dono.ghar ke bilkul beech mein bana hua tha aur kaafi purana lagta tha uski haalat dekhne mein, ek baari achi tarah se dekhne ke baad vo buddhe ko apne padosi ko saath la ke kal subah aane ko bol ke wapis chala gaya...

Agli subah

Agli subah jaisa ki aditya ne bulaya tha dono vahan maujud the. " Toh main ne kal shaam ko ja ke kuva ka nirakshan kia tha achi tarah se aur main ne ye faisla kia hai ki kuva buddhe aadami ka hai aur jhooth bolne ke dandh ke liye is ko 100 kode barsaya jaayenge aur karagarah mein rehna padega ek mah ke liye." Usne buddhe ke padosi ki taraf ishaara karte hue kaha. Ye sun ke us aadami ke paun kaampne lag jaate hai aur vo aditya ke paun mein gir padta hai " maalik aap ne yeh faisla theek nai sunaya, aal galti kar rahe hai maalik " aditya ek sanik ko ishara karta hai jo us aadami ko keech ke alag le jaata hai aur aditya fir se bolna shuru karta hai " kal jab main in dono ke ghar nirakshan karne gaya toh main ne dekha ki kuva mitti ka bana hua tha aur bahut puraana hone ke saath saath inke ghar ke beecho beech bana hua tha jis tarah in sajaan ka ghar tha" usne buddhe aadmi ki taraf ishara kia " us taraf se kuve ki baar baar raasi se ragad khaane ke kaaran ek bahut gehara nishaan padh gaya tha, jabki dusri taraf mujhe essa koi bhi nishaan nazar nai aaya. "

Yeh sab bolne ke baad usne apne saathio ki taraf dekha jin hone sir hila ke uske faisle ka samarthan kia aur uske baad sab se is faisale ke baare mein ek unchi awaaz mein pucha gaya toh zayda tar logo ne haan mein jawab dia...

ReplyQuote
Posted : 10/12/2012 4:25 am
 Anonymous
(@Anonymous)
Guest

Aditya aaj kotliputra jangal ke achute hisse mein aaya tha, is hisse mein naram prithavi aura khay ki badabu atti thi. Yahan motti kali chaadh (trunks) ki bheed si thi, jabaki
muddi shakhaen ek ghane
jaal ke saaman sar ke upar faili hui thi jiske kaaran neeche roshini bhi kaafi kam thi. Aditya ki aadat thi ki vo jab bhi kabhi koi bada faisla sunata tha toh vah shanti ki talaash mein yahan aata tha, yahan is bhaag mein ek alag si shaanti thi jo ki sirf uske ghode ke zameen mein ugi hui ghaas khaane ki awaz se hi bhaang hoti thi.

Aditya ek nazar apne ghode par daali aur usko dekh ke mudda aur jungal mein aage ki or chal padha thoda aage ja ke peddo ke beech mein ek samasodhan(clearing) kiya gaya tha aur wahan par ek ayatakar(rectangular) khand (section) mein khoodi gayi kabar thi.

Aditya bhaari kadhmo se us kabar ki taraf bada aur uske paas jaake apne saath laaye gaye gulab ke phool bade pyaar se uske upar rakh diye aur wahin saath mein baith gaya, iske saath hi uski aakhoon se do aansu ne tapak mitti ke chotte se hisse ko gilla kar dia. " Aaj aapki maut ko pure paanch saal ho gaye hain, aap mujhe is bhrashat logon aur duniya mein chood ke kyu chale gaye, in logon ko ye samajh nahi aata ki hum sab ke purvaaj kissi na kissi tarah judde hue hain phir bhi aaj bhai bhai ka dushmaan hai, dost dost ki inzaat nai karta, aaj toh apni saagi maa ka dhudh bhi bache ko pitte hue begaana sa lagta hai, kya bhagwaan ne yahi sansaar socha hoga banate hue? " Ye keh ke aditya kuch der ke liye chup ho jaata hai yahi soch ke usko koi jawab milega, par shayad vo ek pal ke liye bhul chukka hota hai ki vo yahan apne hi zameer se baat kar raha hota hai kabar toh ek bahaana thi apne jazbaat dil se jhuda karne ka.

" Aaj agar aap mere saath hote toh main aapke kandhe par sar rakh ke ro sakta, aap ko apna dukhda bata sakta, aap ke duttkhaar kha sakta jab bhi mere kissi galaat faisle se kissi maasum ki chamdi udheri jaati,un maasom logo ke priyajano ki baddua hi hai shayad jo aap mujhe chod ke chaale gaye! " yeh bol ke aditya kuch der ke liye chup ho jaata hai aur kabar ko baade dhayan se dekhne lag jaata hai jaise us mitti mein apne sawalo ka jawab use milega. " Lekin isme koi meri bhi galati kaise keh sakta hai main toh vohi karta hun jo mujhe theek lagta hai aur yahan takh ke apne kiye hue faisle ki pushti auro se bhi karwata hun! " aditya kuch sochte hue fir bolta hai. Insaan bhi kudrat ka ajeeb karishma hai dosto ek pal mein khud ko gunehgaar kehta hai aur dusre hi pal khud ko begunah saabit karne ki koshish karta hai.

Aditya kuch der aur wahan pe khamosh baith ta hai aur fir chup chaap wahan se uth ke waapis apne ghode ki taraf chal padta hai waapis apne mehaal mein jaane ke liye, jaate hue vo yeh kehte hue yeh kehta hai " Alvida guru ji, phir mulaakat hogi aapse jalad hi " aur yeh keh ke vo waapis apne ghode ke baith ta aur wapis use mehal ki or mod leta hai...

ReplyQuote
Posted : 10/12/2012 4:26 am
 Anonymous
(@Anonymous)
Guest

Aaj kotliputra main subah se hi arajakata(chaos) ka mahool tha. Saare adhikari apni puri shakti ke upyog kar rahe the ye dekhne ke liye ki saare kaam theek se ho rahe hai ki nahi, vaise hi aditya bhi puri tarah se karyavahi ka nirikashan kar raha tha.

Aaj hi hanumantpur se ek dut ek sandesh le ke aaya tha ki raja chandrasekhar kal takh kotilputra mein aagmaan ho jaayega aur pehli baar vo seh pariwaar vahan padhaar rahe the, toh uske chalte bandobast mein koi kaami nai choddi ja rahi thi.

Mehaal ka har kona saaf kiya ja raha tha, maharaja(chef) khaane baanane ki teyaari kar rahe the, is prakar ki kayi teyaarian ki ja rahi thi.

" Teyaari kaisi chal rahi hai? " Aditya ne use jo pehla sehkarmi dikha us se pucha.
" Abhi takh toh koi rukawatt nai aayi hai senapatti ji " uska jawab aaya. " Agar kuch din pehle hi suchana mil jaati toh kitna acha hota, saari teyaarian araam se samapt ho jaati aur main bhi un sab ka nirakshaan kar paata " Aditya ne kuch sochte hue kaha uske chehre se saaf pata chalta tha ki wah khud ko ashaz mehsoos kar raha tha. Aditya ki aadat thi, ki vo sab kuch sunishchit karta tha teyaari puri hone ke baad. Lekin is alap (short) suchana ke kaaran vo essa karne mein sakshaam nai tha.

" Raja ke saath unki puri fauj aa rahi hogi, unke ghode aur haathi ke liye ashray(shelter) teyaar ho chuka hai ki nahi abhi takh? " Aditya ne sehkarmi ki or dekhte hue sawaal kiya. " Senapatti ji kaam pure jor shor se chal raha hai " " Abhi takh pura nai hua! Jaldi se kaam pura karwao!" Aditya ne chidte hue aadesh diya.

Tabhi ek sipahi aditya ke paas daudta hua aata hai. " Senapatti ji vo....

ReplyQuote
Posted : 10/12/2012 4:26 am